Ракометарите на Динамо Букурешт приредија одлично издание на гостувањето во Франција, каде што убедливо го совладаа Монпелје со 26-36 и обезбедија пласман во нокаут-фазата од Лигата на шампионите. Романскиот состав одигра еден од најдобрите натпревари сезонава токму кога му беше најпотребно и на голема врата ја потврди својата европска амбиција. Гостите уште во текот на натпреварот покажаа дека се дојдени по целиот плен, наметнувајќи висок ритам и постепено зголемувајќи ја предноста. Монпелје немаше решение за расположениот противник, кој на крајот стигна до убедливи десет гола разлика и исклучително важни бодови.

Најзаслужен за големиот триумф на Динамо беше Бранко Вујовиќ, кој одигра фантастичен натпревар и постигна осум погодоци. Значаен придонес имаше и Андреи Бузле, кој ја заврши средбата со шест гола. На романскиот тим му одеше во прилог и исходот од вториот натпревар во групата Е, каде што Барселона го совлада Скандерборг со 30-27. Каталонците со овој триумф го потврдија првото место, додека данскиот состав падна на третата позиција и остана без место во следната фаза на Лигата на шампионите, па ќе продолжи во Европската лига на ЕХФ.