Македонската кошаркарска репрезентација го отвори вториот круг од претквалификациите за Европското првенство со убедлива победа во Австрија, каде што извојува триумф со високи 59-91.

Избраниците на селекторот Берокал брзо го наметнаа својот ритам и уште во раната фаза од мечот остварија двоцифрена предност. Со стабилна дефанзива и сигурна реализација во нападот, предводени од расположените Димитријевиќ и Ефремовски, македонските кошаркари заминаа на пауза со комотни 30-49.

Сликата на теренот не се промени ниту во вториот дел. Македонија продолжи да ја зголемува разликата, која во текот на третиот квартал надмина 25 поени, а пред влезот во последните десет минути резултатот гласеше 44-65. Домаќините немаа никаков одговор за расположената македонска селекција, која рутински го доведе натпреварот до крај за финални плус 32.

Прво име на средбата беше Ненад Димитријевиќ, кој оствари импресивен трипл-дабл учинок со 15 поени, 13 скока и 11 асистенции. Најефикасен во нашиот табор беше Виктор Ефремовски со 17 поени, додека Адем Мекиќ и Мозес Рајт постигнаа по 12 коша, при што Рајт додаде и девет скока. Следната пресметка за Македонија во рамките од овој квалификациски циклус е закажана против селекцијата на Кипар за 26 ноември.