Повеќемесечната студена војна и финансиска драма во Мичиген конечно добија очекуван епилог. Наместо да преземе ризична коцка со прифаќање на квалификациската понуда од скромни 9,6 милиони долари, Ол-стар центарот Џејлен Дурен ги остави заканите на страна и стави потпис на нов петгодишен, целосно загарантиран договор со Детроит Пистонс вреден фантастични 200 милиони долари.

Разврската пристигна на помалку од два часа пред истекот на крајниот рок за ограничено слободни агенти. Иако неговиот менаџерски тим со недели тврдеше дека 21-годишниот кошаркар е подготвен да ризикува повреди и пад на формата за следното лето да замине без обештетување, чистата математика го направи своето. Во најдобар можен развој на настаните следното лето, Дурен од друг клуб би извлекол максимум од 198,8 милиони за пет години, па прифаќањето на сигурните 200 милиони од Детроит се покажа како единствен разумен потег, и покрај тоа што претходно го бојкотираше медиумскиот ден и го пропушти почетокот на подготвителниот камп.

Главните искри за време на преговорите настаа поради намерата на раководството на Пистонс да вметне контролна клаузула за неговата телесна тежина, услов кој по бурните реакции беше целосно исфрлен од конечниот документ. Дополнително, Дурен бараше максимален договор од 287 милиони долари споредувајќи се со богатите потписи на браќата Томпсон, но генералниот менаџер Трајан Ленгдон имаше силен дефанзивен став, драстичниот пад на играта на Дурен во плејофот, каде што просекот му падна од регуларните 19,5 поени и 10,5 скокови на скромни 10,2 поени по меч.

И покрај тоа што клубови како Сакраменто, Милвоки, Атланта и Вашингтон будно ја следеа ситуацијата и бараа опција за трејд, Детроит од самиот почеток одбиваше да влезе во какви било преговори. Во оваа надмудрувачка игра на нерви Пистонс го добија тоа што го сакаа, ја зачуваа својата прва опција под кошот без да ја пробијат границата на максималниот буџет, додека Дурен доби долгорочна финансиска сигурност.