Германскиот репрезентативец Дениз Ундав стави потпис на нов тригодишен договор со екипата на Штутгарт. Напаѓачот ќе остане во клубот до 2029 година, со опција за уште една дополнителна сезона.

За неговите услуги изминатите недели сериозно притискаше тимот на Бајер Леверкузен. Сепак, раководството на Штутгарт реагираше експресно и брзо ги договори сите нови услови.

Овој договор на одличниот напаѓач му гарантира вкупна заработка од дури 21 милион евра. Неговата годишна бруто плата сега ќе изнесува шест милиони евра, што е апсолутен нов клупски рекорд. Разликата до вкупната сума ја добива како бонус за самиот потпис.

Ундав зад себе има фантастична сезона со 25 голови и 14 асистенции на 46 одиграни натпревари. Тренерот Себастијан Хенес често го користеше како „десетка“ веднаш зад Ермедин Демировиќ.

Големи очекувања од него во иднина има и германскиот селектор Јулијан Нагелсман. Тој го гледа напаѓачот како клучен џокер за претстојното Светско првенство.