Германскиот репрезентативец Денис Шрудер уште еднаш ги спакува куферите и го промени тимот во НБА лигата. Искусниот плејмејкер е трејдуван од Кливленд Кавалирс во Шарлот Хорнетс, додека во спротивен правец замина 25-годишниот американски бек Тре Мен. Според информациите на инсајдерот на ЕСПН, Шамс Чаранија, Кливленд покрај Шрудер му испратил и парична компензација на тимот на Шарлот.

Со оваа преселба продолжува неверојатното НБА патување за 32-годишниот организатор на играта. Ова е дури 12-ти пат во неговата 13-годишна кариера зад океанот да биде дел од играчка размена, носејќи ги дресовите на дури 11 различни екипи. Шрудер ја започна сезоната 2025/26 во Сакраменто Кингс, но пред истекот на преодниот рок заврши во Кливленд, а сега нова дестинација во неговата богата кариера ќе биде Шарлот, каде што пристигнува со просек од 10,8 поени и 4,9 асистенции од изминатата сезона.