Првиот историски УФЦ спектакл во српската престолнина ги надмина сите очекувања на челниците на најголемата ММА организација во светот. Првиот човек на УФЦ, Дејна Вајт, не го криеше своето воодушевување на прес-конференцијата по завршувањето на настанот, истакнувајќи дека атмосферата во салата била фантастична уште од уводните борби па сè до главниот меч на вечерта.

Вајт објави дека на трибините имало 18.623 гледачи и дека публиката ги оправдала сите најави за страствениот спортски амбиент во овој регион. Тој посебно го издвои Урош Медиќ, кој со експресен нокаут за 30 секунди ја запали салата, нагласувајќи дека српскиот борец има сè што е потребно да израсне во светска суперѕвезда доколку продолжи со истото темпо. Вајт даде позитивна оценка и за дебито на Александар Ракиќ во тешка категорија, а на прашањето дали УФЦ повторно ќе се врати во Србија, одговори без какво било двоумење: „Да, апсолутно!“.