УЕФА во соработка со спортскиот гигант „Фанатикс“ и брендот „Топс“ воведе интригантна новина за сезоната 2026/27 во Лигата на шампионите, каде што секој фудбалер кој за првпат ќе заигра во елитата ќе носи специјална дебитантска ознака на ракавот од својот дрес.

Станува збор за амблем со натпис „DEBUT“ сместен во препознатливото „Starball“ лого на УЕФА, кој имаат право да го носат сите фудбалери во моментот кога за првпат ќе крочат на теренот, независно дали се во првата постава или влегуваат како замена. Оваа можност секој фудбалер ја добива само еднаш во кариерата, додека играчите кои ќе го преседат целиот меч на клупата за резерви ќе мора да почекаат за својот знак сè додека официјално не влезат во игра.

Она што го прави овој проект посебно атрактивен за колекционерите е процесот по завршувањето на натпреварот. По последниот судиски свиреж, синиот дел од амблемот се отстранува од носениот дрес, добива сертификат за автентичност и се испраќа до компанијата „Топс“, каде што се вградува во уникатна, рачно потпишана картичка „one-of-one trading card“. На тој начин, првиот меч на секој фудбалер во најелитното европско натпреварување се претвора во траен и вреден историски предмет.

Сличен концепт веќе постигна голем успех на Светското првенство и во големите американски спортови под закрила на „Фанатикс“, а најавено е дека од сезоната 2027/28 оваа програма ќе биде проширена и во женската Лига на шампиони.