Македонскиот репрезентативец Дарко Чурлинов се наоѓа пред предвремен раскин на договорот со турскиот клуб Кочаелиспор. Преговорите меѓу двете страни се во завршна фаза, а официјализацијата се очекува веќе в понеделник. Ваквиот развој на настаните го потврди и претставникот на клубот, Учар, кој истакна дека се бара решение што ќе биде финансиски поволно за турскиот колектив.

Од раководството на Кочаелиспор порачаа дека процесот се одвива во конструктивна атмосфера и дека сите конкретни детали околу разделбата ќе бидат соопштени по потпишувањето на документацијата и завршувањето на исплатите.

Со предвремениот прекин на соработката, Чурлинов ќе стане слободен играч и ќе може да избере нова средина во овој летен преоден рок. Како најсериозна дестинација за македонскиот крилен фудбалер во моментов се споменува шампионатот на Полска.