По елиминацијата на Лос Анџелес Лејкерс со убедливи 4-0 од Оклахома Сити Тандер, главната тема во кошаркарскиот свет е иднината на легендарниот Леброн Џејмс.
По завршувањето на својата рекордна 23-та сезона во НБА, 41-годишниот кошаркар призна дека сè уште е рано за конечни одлуки и дека му е потребен сериозен одмор со семејството пред да пресече дали ќе продолжи да игра. Оваа сезона беше специфична за него, бидејќи за првпат во кариерата се соочи со улогата на „трета опција“ во тимот каде примарна фигура беше Лука Дончиќ, ситуација која Леброн ја опиша како нов и голем предизвик. И покрај промената во хиерархијата, тој во плеј-офот бележеше фантастични 23,2 поени и над 7 асистенции по натпревар, докажувајќи дека сè уште е конкурентен на највисоко ниво.
Како слободен агент ова лето, Џејмс порача дека јавноста ќе биде навремено известена за неговите планови, додека фановите ширум светот со нетрпение чекаат да видат дали „пензијата“ е навистина следната станица за еден од најголемите на сите времиња.
