Наместо планираното фудбалско шоу во Њујорк, „кариоките“ добија ладен туш уште на самиот старт на Светското првенство. На преполниот „Метлајф“ стадион, селекцијата на Мароко одигра храбро и тактички совршено, извлекувајќи големи 1-1 против апсолутниот фаворит во групата Ц. Ако се погледне целиот развој на настаните на теренот, Африканците се оние кои имаат повеќе причини да жалат за трите бода, додека предводникот на Бразил, Карло Анчелоти, веројатно веќе го боли глава од сериозните дупки во играта на неговите ѕвезди.

Мароканците без никаков респект тргнаа во офанзива уште од првата минута, а таквата иницијатива вроди со плод во 21-вата минута. Брахим Дијас со хируршки прецизно додавање ја повлече акцијата, а Исмаил Саибари со велемајсторска завршница го шокираше Алисон за заслужено водство на својот тим. Јужноамериканците изгледаа целосно отсечено сè до 32-рата минута, кога Винисиус Жуниор реши сам да ги решава работите. Асот на Реал Мадрид ја прими топката на левата страна, „нанижа“ неколку противнички дефанзивци и со вистински проектил во далечниот агол донесе израмнување, постигнувајќи го веројатно најубавиот гол во досегашниот тек на Мундијалот.

Очекувањата дека Бразил ќе се разигра во второто полувреме целосно пропаднаа. Наместо тоа, видовме здодевен и премногу претпазлив фудбал во кој двата тима како свесно да решија да не ризикуваат и да го сочуваат почетниот бод. Иако Бразилците ја имаа топката повеќе во свој посед, нивните напади беа безидејни, што исфрустрираните навивачи на трибините почнаа со гласни свирежи да ја испраќаат екипата. На крајот, по еден бод за двата табора на стартот. Бразил ќе мора да го поправа впечатокот во следното коло против аутсајдерот Хаити, додека цврстото Мароко го чека нов сериозен испит против Шкотска.