Ол-стар крилото Џејлен Браун и официјално беше претставен како ново засилување на Филаделфија Сиксерс по сензационалниот трејд од редовите на ривалот Бостон Селтикс, каде што помина цели десет години. На својата прва прес-конференција, Браун призна дека бил разочаран од начинот на кој раководството на Бостон комуницирало со него и откри дека го фрлил телефонот низ соба кога дознал за зделката. Сепак, тој додаде дека самиот трансфер не го изненадил целосно со оглед на тоа колку често неговото име се споменувало во шпекулациите изминатите години.

Филаделфија ова лето создава вистински „супер-тим“ откако, покрај Браун, како слободен агент го ангажираше и Леброн Џејмс, формирајќи застрашувачки состав заедно со Џоел Ембид и Тајрис Макси. Браун истакна дека е свесен за талентот и егото во соблекувалната, но нагласи дека е подготвен на сите потребни жртви во име на победите, додавајќи дека со нетрпение очекува да учи од искуството на Леброн и да изгради авторитет во новата средина.

Што се однесува до односот со досегашниот соиграч Џејсон Тејтум, Браун потврди дека се уште немаат разговарано по трејдот, но посочи дека меѓу нив постои максимална почит поради заеднички освоената шампионска титула со Селтикс. Со тоа, Браун стави крај на минатото во Бостон и го насочи целосниот фокус кон новата ера во кариерата со екипата на Сиксерс.