Иако преодниот рок во НБА лигата уште не е официјално започнат, Бостон Селтикс веќе се наоѓаат во центарот на кошаркарските шпекулации поради потенцијален трејд на Џејлен Браун. Инсајдерите пренесуваат дека Хјустон Рокетс се сериозно заинтересирани и веќе подготвуваат пакет за негов ангажман пред почетокот на следната сезона. Доколку Бостон се согласи да ги сослуша понудите, Хјустон е подготвен да испрати привлечна понуда во која би биле вклучени Алперен Шенгун, Џабари Смит Џуниор, како и избори од првата рунда на драфтот.

Главната причина поради која Бостон воопшто би размислувал за разделба со својата офанзивна ѕвезда е од финансиска природа. Браун има супермакс договор вреден околу 285 милиони долари, а бидејќи и Џејсон Тејтум заработува слична сума, Селтикс се соочуваат со строгите правила за данокот на луксуз. Оваа финансиска граница драстично им ги врзува рацете на челниците при носење нови засилувања и го ограничува просторот за градење квалитетна клупа околу главните играчи. Покрај економските пречки, Браун се соочи со критики и за неговите послаби партии во неодамнешниот плејоф каде што не успеа константно да го повлече тимот кога беше најпотребно.

Покрај парите и формата, во американските медиуми веќе кружат информации дека Бостон одблиску ја следи и ситуацијата со Јанис Адетокумбо. Доколку се отвори и најмала шанса за ангажман на грчкиот кошаркар, Селтикс ќе мора да жртвуваат висока плата, што го прави заминувањето на Браун најочигледен излез од таквата ситуација. Хјустон сигурно нема да биде единствениот заинтересиран клуб на пазарот доколку Бостон се реши на ваков чекор, но Рокетс во моментов први тргнуваат во офанзива за потписот на Браун.