Реал Мадрид го доживеа првиот пораз во новата сезона под водство на Жозе Мурињо. „Кралевите“ имаа повеќе од играта, повеќе удари и создадоа повеќе шанси, но на крајот Бетис славеше со минимални 1-0 и приреди големо изненадување. Со овој триумф Бетис се израмни со Реал на табелата – двата тима имаат по девет бодови од четири натпревари, со три победи и еден пораз.

Долго време се играше без голови, а домаќините успеаја да го зададат ударот во 81. минута. По корнерот од десната страна, резервистот Трој Перот се најде на вистинското место и со удар ја испрати топката во мрежата на Куртоа за 1-0. Реал веднаш тргна по израмнување, а во 85. минута Килијан Мбапе беше на чекор до гол. Французинот биеше од десната страна, но топката го погоди пределот меѓу гредата и дирекот.

Две минути подоцна следуваше нова голема драма. Еспи постигна спектакуларен гол за 1-1. Винисиус од левата страна испрати одличен центаршут со десната нога, а Еспи, свртен со грб кон голот, изведе мајсторски волеј и ја смести топката во мрежата. Сепак, радоста на гостите беше краткотрајна. По интервенција на ВАР, голот беше поништен поради офсајд во акцијата која му претходеше. Реал не се откажа и продолжи да напаѓа, а судијата одреди шест минути продолжение. Во третата минута од надополнувањето, Винисиус изнуди пенал и Реал доби огромна шанса да се спаси од пораз. Одговорноста ја презеде Мбапе, но францускиот напаѓач ќе сака што побрзо да го заборави овој момент. Голманот Валјес одлично ја прочита неговата намера, ја погоди страната и го одбрани ударот од белата точка! Но, драмата тука не заврши.

Реал доби корнер, топката беше одлично нафрлена, а Еспи највисоко скокна и упати удар со глава под пречката. Валјес, сепак, повторно беше фантастичен и со уште една голема интервенција ја сочува мрежата. Така Бетис успеа да го издржи огромниот притисок во финишот и да запише голема победа од 1-0 над Реал Мадрид, нанесувајќи му го првиот пораз на тимот на Мурињо оваа сезона.