Јужноамериканскиот фудбал уште еднаш покажа зошто е дефиниција за чиста емоција и зошто бајките на зелениот терен сè уште се можни. Кога еден аутсајдер ќе реши да го предизвика воспоставениот поредок и да тргне против традиционалните гиганти, тогаш се раѓаат приказни кои со генерации ќе се раскажуваат со солзи во очите.

Клубот Белграно испиша вистинска филмска сторија и ја освои својата прва шампионска титула во Аргентина откако во епско и драматично финале на стадионот „Марио Алберто Кемпес“ го фрли на колена моќниот Ривер Плејт со 3:2. Составот предводен од стратегот Рикардо Зјелински покажа невиден карактер и челичен менталитет, успевајќи дури двапати да се врати од резултатска негатива против апсолутниот фаворит. Натпреварот го донесе целиот препознатлив аргентински фолклор. пеколно темпо, огромна тензија, жестоки стартови на граница на инцидент и контроверзни VAR одлуки кои ја доведоа атмосферата на трибините до точка на вриење. Белграно со ова само ја продолжи својата традиција да биде кошмар за тимот од Буенос Ариес, исто како и во незаборавната 2011 година кога токму овој тим го пресели Ривер во втората лига.

Патот до овој историски трофеј за тимот од Кордоба беше навистина импресивен и полн со искушенија. Пред да го кренат шампионскиот пехар во големото финале, тие во плеј-офот најпрво го елиминираа лутиот градски ривал Кордоба Таљерес, а потоа ги преслушаа и екипите на Санта Фе и Аргентинос Јуниорс. За клубот основан пред повеќе од еден век, овој триумф не е само обична титула, туку момент кој засекогаш го менува фудбалскиот релјеф во Аргентина и ги запишува овие играчи како бесмртни легенди меѓу своите фанови.