Транзицијата од врвен спортски терен во суровиот свет на бизнисот е предизвик на кој паднале многу славни имиња, но за некои луѓе успехот едноставно е запишан во нивниот генетски код. Кога на суровиот професионализам и напорната работа ќе им се додадат визионерски инвестиции и долгорочна стратегија, границите на богатството се поместуваат до нестварни височини. Токму тоа му појде од рака на поранешниот капитен на Англија, кој уште еднаш испиша историја, но овојпат на финансиски план.

Според најновата престижна листа на богаташи на „Sunday Times“, Дејвид Бекам и официјално стана првиот британски спортист кој го достигна статусот на милијардер. Заедничкото богатство на славниот фудбалер и неговата сопруга Викторија сега се проценува на вртоглави 1,185 милијарди фунти, што ги позиционира веднаш зад семејството на поранешниот шеф на Формула 1, Берни Еклстон. Она што фасцинира е податокот дека парот го удвоил својот имот за само 12 месеци, со оглед на тоа што претходната година располагаа со „само“ 500 милиони фунти.

Клучот за овој спектакуларен финансиски скок лежи во визионерскиот потег на Бекам на американскиот тло. Неговиот удел од 26% во фудбалскиот клуб Интер Мајами, кој го доби како бенефиција уште при трансферот во ЛА Галакси, доживеа комерцијална експлозија по доаѓањето на Лионел Меси. Вредноста на клубот скокна на 1,4 милијарди долари, што му донесе на Бекам стотици милиони чист профит.

Секако, фудбалот е само дел од нивната деловна мрежа. Империјата на парот вклучува продажба на удели во комерцијални компании, филмски продукции, велнес брендови, како и модното царство на Викторија Бекам, кое денес вреди околу 700 милиони долари. Нивниот успех не е случаен, туку е резултат на долгорочна стратегија и паметно користење на стручни совети. За споредба со останатите спортски ѕвезди од Островот, Луис Хамилтон е далеку зад нив на петтото место со 435 милиони фунти, додека голферот Рори Мекилрој располага со 325 милиони фунти.