Непријатни вести за Башкими. Македонскиот прволигаш се најде под санкции на Светската фудбалска федерација (ФИФА), која му изрече забрана за трансфери во следните три преодни рока поради неисполнети финансиски обврски кон странски побарувач. Кумановскиот клуб се најде на официјалната листа на ФИФА на 19 октомври, со што и официјално доби ограничување за доведување и регистрирање нови фудбалери. Ваквата мерка претставува дополнителен предизвик за Башкими, особено во планирањето на играчкиот кадар за следните натпреварувачки периоди.

Сепак, забраната не мора да значи дека клубот ќе биде без можност за засилувања во текот на целиот предвиден период. Клучно е решавањето на финансискиот спор, односно подмирувањето на обврските кон доверителот. По исполнувањето на условите за отстранување на санкцијата, Башкими ќе може повторно да регистрира нови играчи. Покрај кумановци, на листата на ФИФА се наоѓаат и два други македонски клуба, Шкупи и Воска Спорт. Ситуацијата е особено сериозна кај овие два тима, кои, според објавените податоци, имаат три, односно четири блокади.

Така, финансиските обврски продолжуваат да создаваат проблеми за дел од македонските клубови, а останува да се види колку брзо Башкими ќе успее да го надмине проблемот и да ја отстрани пречката за регистрација на нови фудбалери.