Селекторот на Босна и Херцеговина, Сергеј Барбарез, изрази голем оптимизам пред историскиот премиерен настап на својата репрезентација на Светското првенство против домаќинот Канада во Торонто. Иако тимот се соочи со кадровски проблеми непосредно пред премиерата, предводникот на „змаевите“ верува во новиот карактерен идентитет и победничкиот менталитет на екипата.

Босанскиот табор претрпе сериозен удар откако дефанзивецот Нидал Челик пред два дена го повреди менискусот и мораше да замине на операција. На негово место итно е повикан Арјан Малиќ. Од друга страна, Барбарез потврди дека искусниот Един Џеко е максимално подготвен и ќе конкурира за првиот тим, додека за напаѓачот Харис Табаковиќ овој меч доаѓа прерано, па тој ќе биде подготвен за второто коло. Селекторот призна дека ова е најголемиот натпревар во неговата кариера, но јасно порача дека целта на тимот е пласман во нокаут-фазата.

Патот до овој шампионат за новата генерација на БиХ беше исклучително тежок, а новиот идентитет се градеше низ силни натпревари во Лигата на нации против велесили како Англија, Италија, Холандија и Германија. Барбарез истакна дека токму тој процес на созревање ги научил фудбалерите да играат посрчено и поедноставно, нагласувајќи дека фудбалот за неговиот народ претставува емотивно засолниште и извор на радост.

Странските медиуми покажаа голем интерес за карактерот на босанските фудбалери, при што Барбарез направи директна споредба со успесите на нивниот прв сосед. Тој посочи дека Хрватска веќе покажа оти квалитетот и менталната сила на овие простори можат да донесат светски успеси, па нема причина зошто и неговиот тим да не тргне по тие стапки. Иако дури 24 од вкупно 26 фудбалери во составот се целосни дебитанти на Светските првенства, желбата за игра и мотивот се на највисоко ниво пред вечерашниот дуел.