Алијанц Арената повеќе не е неосвоива тврдина. По низата победи на Баерн Минхен на домашен терен оваа сезона, Арсенал стана првиот колектив што успеа да си замине со плен од Баварија, изборувајќи драматични 2:2 во дербито на Лигата на шампионите.

Мечот започна со вистински шок за Микел Артета по брзата повреда на Букајо Сака. Сепак, пехот експресно се претвори во радост благодарение на резервистот Еберечи Езе. Искористувајќи го невниманието на Јосип Станишиќ во дефанзивната линија, Езе ја избегна офсајд-замката и рутински ја затресе мрежата за предност на гостите. Баварците брзо го кренаа темпото, а Хари Кејн уште еднаш покажа дека е повеќе од обичен голгетер, со генијално проигрување го пронајде Алфонсо Дејвис, кој пред паузата израмни на 1:1.

Тензијата го достигна врвот во вториот дел кога Кејн избори пенал по играњето со рака на Јуриен Тимбер и ладнокрвно реализираше од белата точка за потполн пресврт. Сепак, кога сите очекуваа Баерн да го запечати триумфот, „тобџиите“ изведоа брза акција во 82. минута. Виктор Џокереш и Деклан Рајс одиграа перфектно двојно додавање, а англискиот репрезентативец со прецизен удар го постави конечниот резултат и избори голем бод за лондонскиот гигант.