Најавеното дерби на шестото коло во германската Бундеслига се претвори во целосна демонстрација на сила на Баерн Минхен, кој пред своите навивачи го декласираше РБ Лајпциг со убедливи 6:1 (3:0).

Баварскиот гигант уште од самиот почеток наметна застрашувачки ритам и за нешто повеќе од триесет минути ја реши сите дилеми околу победникот. Луис Диаз ја отвори серијата погодоци во 12. минута по асистенцијата на Џошуа Кимих, а веќе во 28. минута Александар Павловиќ зголеми на 2:0 по одличен соло-продор. Шест минути подоцна, Мајкл Олисе со прецизен удар од работ на казнетиот простор ја затресе мрежата на гостите за убедливи 3:0 уште на полувремето.

Ниту паузата не го запре налетот на домашниот тим. Веќе во 47. минута Луис Диаз со својот втор гол, овојпат на асистенција на Хари Кејн, зголеми на 4:0, а само пет минути подоцна и самиот Кејн се запиша во стрелците за петти гол во мрежата на Вандевоорт. Расположениот Луис Диаз го комплетираше својот хет-трик во 69. минута со уште еден прецизен удар за 6:0, додека гостите во втората минута од судиското надополнување преку Андрија Максимовиќ успеаја само да го постигнат утешниот погодок за конечни 6:1.

Со овој доминантен триумф, Баерн Минхен го искористи киксот на Борусија Дортмунд во Берлин и се искачи на лидерската позиција на табелата со 14 освоени бодови поради подобрата гол-разлика, додека РБ Лајпциг останува на седмото место со девет бода.