Диего Симеоне го доби можеби најголемиот подарок на трансфер-пазарот ова лето. Угледниот шпански весник „Марка“ лансираше апсолутна ексклузива дека Атлетико Мадрид ги договорил сите детали со Бајер Леверкузен за преминот на шпанскиот репрезентативец, Алехандро Грималдо. Мадридскиот клуб заврши феноменална менаџерска работа на пазарот, бидејќи за еден од најдобрите леви бекови во светот ќе плати само 15 милиони евра фиксно, плус дополнителни 8 милиони преку лесно остварливи бонуси. Со оглед на тоа што играчот веќе влезе во последната година од договорот со „фармацевтите“, ова е вистински економски мастерклас на управата на „јорганџиите“.

Грималдо уште пред пет дена ги прецизираше своите лични услови и ќе стави потпис на верност кон Атлетико до 2029 година. Целата операција ќе се финализира деновиве во САД, каде фудбалерот ќе ги одработи задолжителните лекарски прегледи директно во тренинг кампот на националниот тим на Шпанија.

Ваквиот експресен расплет предизвика навивачки земјотрес во Каталонија. Социјалните мрежи буквално „гореа“ од брутални критики насочени кон спортскиот директор на Барселона. Фрустрацијата на јавноста е комплетно оправдана, Грималдо е дете на „Ла Масија“ кој помина години во младинскиот погон на Барса, пред клубот лесно да се откаже од него и да го продаде во Бенфика за два милиони евра.

Наместо Каталонците да ја поправат грешката од минатото и да го вратат во сопствените редови за прилично скромна сума, тие дозволија директниот ривал за титулата во Ла Лига драстично да се засили. Шпанецот зад себе има одлични сезони во Бундеслигата, каде под палката на Чаби Алонсо беше еден од најдобрите играчи, напуштајќи го Леверкузен со застрашувачка статистика од 30 постигнати голови и 45 асистенции.