Победата на Арсенал над Њукасл од 1-0 во 34-тото коло од Премиер лигата остана во сенка на двојниот медицински шок за „топчиите“. Микел Артета се соочува со сериозни проблеми во финишот на сезоната, откако двајца клучни првотимци, Каи Хаверц и Еберечи Езе, мораа предвреме да го завршат натпреварот поради повреди.
Германскиот интернационалец Хаверц го напушти теренот уште во 34-тата минута по еден незгоден пад, жалејќи се на болка во горниот дел од ногата. Неговата повреда е голем удар за офанзивата, со оглед на тоа што сезонава веќе има скромни, но значајни 5 гола и 3 асистенции. Само што започна второто полувреме, малерот го стигна и Еберечи Езе. Иако англискиот играч за врска донесе рано водство за својот тим во 9-тата минута, тој не го издржа темпото и поради мускулни проблеми беше повлечен од игра по само неколку минути во вториот дел.
Артета на прес-конференцијата по мечот потврди дека двајцата фудбалери се соочуваат со мускулни контузии и дека допрва ќе следат детални лекарски прегледи. За Езе ова е особено тежок момент, бидејќи тој е во извонредна форма со 10 постигнати гола и 4 асистенции во досегашниот дел од кампањата. „Топчиите“ сега со нетрпение ги чекаат резултатите од тестовите, надевајќи се дека нивните клучни алки во средниот ред нема подолго да отсуствуваат од терените во најкритичниот дел од борбата за трофеи.
