Лондонскиот гигант Арсенал официјално го реши едно од клучните прашања за иднината на својата дефанзивна линија. Еквадорскиот репрезентативец Пјеро Инкапие потпиша долгорочен договор со актуелниот англиски шампион, откако клубот ја активираше откупната клаузула од неговиот договор со Бајер Леверкузен.

Иако финансиските детални не беа јавно објавени, британските медиуми пренесуваат дека Арсенал за овој трансфер издвоил околу 40 милиони евра, додека 24-годишниот дефанзивец стави потпис на верност кон „топчиите“ до јуни 2031 година. Со овој потег дефинитивно се стави крај на неизвесноста околу неговиот статус, бидејќи изминатата сезона ја помина на „Емирати“ како позајмен фудбалер.

Инкапие за многу краток период стана еден од најважните адути на менаџерот Микел Артета, благодарение на неговите сигурни партии и способноста подеднакво квалитетно да одговори на повеќе позиции во задната линија. Во шампионската сезона на Арсенал, тој забележа 39 настапи во сите натпреварувања и даде огромен придонес во освојувањето на пехарот во Премиер лигата, со што целосно ја оправда довербата на стручниот штаб.

Пред да пристигне во Лондон, Еквадорецот четири години го носеше дресот на Бајер Леверкузен, каде што пристигна од аргентинскиот Талјерес де Кордоба и се афирмираше на европската сцена преку одличните настапи во Бундеслигата. Тој е стандарден член на репрезентацијата на Еквадор, со која во моментов настапува на Светското првенство.