Аргентина со убедлив триумф ја започна новата етапа без Лионел Меси во репрезентативниот состав. Светскиот шампион славеше со 4:0 против Боливија во пријателски натпревар, во кој „албиселесте“ уште еднаш покажа дека располага со квалитет и надвор од најголемата ѕвезда на тимот.

Лаутаро Мартинез го отвори резултатот во 19. минута, а само десет минути подоцна Николас Пас зголеми на 2:0. Аргентина со сигурна предност замина на пауза, а продолжението донесе уште две реализации. Кристијан Ромеро во 54. минута погоди за 3:0, додека конечниот резултат го постави Хозе Мануел Лопес четири минути пред истекот на регуларниот дел.

Ова беше првиот настап на Аргентина по поразот од Шпанија во финалето на Светското првенство, но и првиот натпревар откако Меси ја заврши својата репрезентативна кариера. Во отсуство на 39-годишниот капитен, капитенската лента ја носеше Кристијан Ромеро. Меси, сепак, сè уште не го одигра последниот натпревар во дресот на Аргентина. Планирано е тој да настапи на прошталниот натпревар против Бенин следниот вторник во Буенос Аирес.

Меси за Аргентина одигра 207 натпревари и постигна 125 голови, со што е најдобар стрелец во историјата на националниот тим. Дури 21 од неговите репрезентативни голови беа постигнати на Светските првенства. Пред официјалното збогување со својата најголема фудбалска ѕвезда, Аргентина ќе одигра уште еден контролен натпревар. Следниот противник на „албиселесте“ ќе биде Буркина Фасо, во сабота.