Светскиот вицешампион Аргентина одигра убедлива контролна средба и со високи 7-0 ја совлада репрезентацијата на Буркина Фасо пред своите навивачи во Буенос Аирес. „Гаучосите“ уште од самиот почеток ја презедоа контролата и практично го решија прашањето на победникот во првата половина од натпреварот.

Разликата во квалитет беше очигледна, а ситуацијата дополнително му одеше во прилог на домаќинот бидејќи Буркина Фасо настапи со значително изменет состав. Поради финансиски проблеми со федерацијата, најдобрите репрезентативци на африканската селекција не допатуваа во Аргентина, па шансата ја добија претежно младите фудбалери.

Аргентина не чекаше долго за да ја наметне својата игра. Лаутаро Мартинез во четвртата минута беше прецизен од вториот обид, откако претходно не реализираше удар од белата точка. Само четири минути подоцна следеше автогол на Мумуни Диало, а во 12. минута Џанлука Престиани веќе донесе огромни 3-0.

До паузата домашната селекција постигна уште два гола. Нико Пас ја продолжи гол-серијата, а Хулиан Алварез со својот погодок се погрижи Аргентина на одмор да замине со предност од 5-0. Во второто полувреме темпото очекувано падна, но „Гаучосите“ продолжија да ја контролираат средбата. Франко Мастантуоно во 57. минута ја затресе мрежата по асистенција од Лаутаро Мартинез, додека Џулиано Симеоне во судиското продолжение ги постави конечните 7-0.

За Аргентина ова беше успешна генерална проба пред уште еден натпревар против африканска селекција. Следен противник ќе биде Бенин, а средбата во Буенос Аирес се очекува да има посебна тежина поради најавите дека би можела да биде последниот репрезентативен настап на Лионел Меси на домашен терен.