Светскиот првак Аргентина продолжува со сигурен ритам да ја крева формата пред почетокот на Мундијалот. „Гаучосите“ ноќва во Тексас одиграа уште еден контролен меч и без премногу мачење, рутински славеа против селекцијата на Хондурас со 2:0.

Селекторот Скалони свесно реши да ги поштеди силите на најдобрите, па Лионел Меси целиот натпревар го изгледа од клупата за резерви. Иако целиот стадион во Тексас скандираше по првата ѕвезда на денешницата, аргентинскиот стратег остана доследен на својот план за ротација, а неговите избраници на теренот покажаа дека можат лесно да ја завршат задачата и без капитенот.

Резултатот беше отворен во 37-та минута од натпреварот. По еден прекршок во казнениот простор на Хондурас, судијата покажа на белата точка, а Мартинез беше немилосрден егзекутор за водство од 1:0. Точка на натпреварот и конечен печат на победата стави Џулијано Симеоне во 54-та минута, кога од непосредна близина ја затресе противничката мрежа. Овој погодок донесе и голем бран задоволство на клупата каде што камерите веднаш го уловија расположениот Меси како го прославува триумфот на своите соиграчи.