Елиминацијата од Баерн Минхен во Лигата на шампионите и огромното заостанување зад Барселона во домашното првенство ја прелија чашата кај Флорентино Перез, кој веќе донел одлука за смена на Алваро Арбелоа. По завршувањето на натпреварот во Минхен, првиот човек на Реал Мадрид одржал бурен говор во соблекувалната, најавувајќи радикални промени во тимот и директно порачувајќи им на ѕвездите дека многумина од нив ја завршуваат својата кариера во белиот дрес.
Единствената светла точка во очите на претседателот бил младиот Арда Ѓулер, чиј настап во Германија беше единствениот поштеден од жестоките критики на управата.
Во обид веднаш да ја стабилизира ситуацијата, Перез стапил во контакт со Зинедин Зидан, но неговиот последен обид да го врати „спасителот“ завршил со неуспех. Според информациите на радио „Cadena SER“, францускиот стратег учтиво ја одбил понудата, јасно ставајќи до знаење дека неговиот следен предизвик е селекторското место на Франција.
Зизу планира да ги преземе „триколорите“ веднаш по завршувањето на Мундијалот во Северна Америка, оставајќи го Мадрид во тешка потрага по нов лидер кој ќе ги извлече од најавената резултатска катастрофа.
