Пласманот на Шпанија во финалето на Светското првенство по победата од 2:0 над Франција не е само приказна за еден натпревар. Ова е триумф на еден совршено изграден систем кој трае со години и кој фудбалерите го усовршуваат уште од најрана возраст.

Легендарниот француски напаѓач Тјери Анри по натпреварот отворено призна дека неговата репрезентација била целосно надиграна од противникот на теренот.

„Премалку од Франција на овој натпревар. Шпанија комплетно ја контролираше играта со топка и без неа. Покажаа зошто се актуелни европски шампиони и заслужено патуваат во големото финале“, изјави Анри.

Тој додаде дека шпанската фудбалска филозофија се учи уште од деветгодишна возраст, па затоа играчите подоцна само продолжуваат да го играат она што го знаат со години.

На неговите зборови се надоврза и Златан Ибрахимовиќ, кој ја посочи најголемата предност на „црвената фурија“ во однос на другите селекции.

„Кога зборувам за Шпанија, не зборувам за некој поединец. Тимот е нивната најголема ѕвезда. Тие воопшто не зависат од еден играч, дури ни кога во составот го имаат младиот Ламин Јамал“, нагласи популарниот Ибра.

Дека тоа е плод на системот, а не на една генерација, потврдуваат и извонредните резултати на Шпанија во изминатиот период. Машката селекција ја освои Лигата на нации во 2023 година, стана европски првак во 2024, а сега е и на чекор до светскиот трон на Мундијалот во 2026 година. Творецот на овие успеси е добро воспоставениот модел кој со години носи доминација во светскиот фудбал.