Шкотската фудбалска асоцијација тргна во интензивна потрага по нов кормилар, откако Стив Кларк поднесе оставка по елиминацијата во групната фаза на Светското првенство. Како главен фаворит за негов наследник во медиумите се издвојува познатиот австралиски стратег Анге Постекоглу, кој е слободен на пазарот по разделбата со Нотингем Форест.

Сепак, поранешниот менаџер на Тотенхем не е единствената опција бидејќи Шкотите ги држат сите карти отворени. Во потесниот круг на кандидати се наоѓаат и актуелниот предводник на Евертон, Дејвид Мојс, како и Стивен Нејсмит и легендата на Ренџерс, Бари Фергусон. Раководството на сојузот нема намера да брза, па конечниот избор најверојатно ќе биде соопштен пред почетокот на Лигата на нации во септември.

Кларк си заминува со солиден биланс од 38 победи на 81 натпревар, но неговиот престој го одбележаа слаби резултати на големите турнири каде единствена радост беше триумфот над Хаити. Доколку изборот сега падне на Постекоглу, националниот тим го чека радикален тактички пресврт и премин кон неговиот препознатлив ултра офанзивен стил со висок пресинг и многу трчање.