Шпанскиот тениски ас Карлос Алкараз го започнува својот настап на турнирот од серијата АТП 500 во Виена со јасна цел, конечно да ја прекине негативната традиција и да стигне до трофеј во есенскиот дел од сезоната. Една од најслабите точки на најмладиот број еден во историјата се токму турнирите по Мастерсот во Шангај, но Шпанецот е решен да ја промени таа статистика по паузата предизвикана од повреда.

Во пресрет на турнирот во австриската престолнина, Алкараз отворено призна дека најмногу му недостигаат гигантските пресметки со најголемите ривали.

„Имав долга пауза поради повреда и сакам да го надокнадам пропуштеното. Виена е одлична можност за тоа бидејќи турнирот е силен и ме очекува важна недела. Искрено, најмногу ми недостигаат мечевите со Синер и Ѓоковиќ. Дуелите со нив бараат нешто сосема различно, те тераат до самиот лимит и веднаш сфаќаш на што мораш дополнително да работиш на следниот тренинг за да напредуваш“, истакна Алкараз, кој со Јаник нема играно уште од април во Монте Карло, а со Новак од финалето на Австралија Опен во јануари.

Покрај сопствените амбиции, Карлитос упати серија комплименти на сметка на Александар Зверев, кој со пласман во четвртфиналето во Виена и официјално ќе се искачи на врвот на АТП ранг-листата.

„Саша потполно го заслужува местото број еден. Во тенисот не е важно само да излезеш и да одиграш добро на еден турнир, туку тоа да го правиш континуирано, од недела во недела во текот на целата година. Неговото ниво е неверојатно, успева да избегне тешки повреди и постојано одржува врвна форма, па затоа искрено се радувам за него. Исто така, Дејвис купот е огромна цел за мене оваа сезона. Имаме одличен тим за завршницата во Болоња и подготвен сум да ѝ помогнам на Шпанија, почнувајќи од првата пресметка против Австрија“, заклучи Алкараз.