Алкалоид останува со максимален ефект во Суперлигата, но до петтата победа стигна потешко од очекуваното. Тимот на Кире Лазаров го совлада Тиквеш со 31-30 во натпревар во кој домашните имаа предност во најголемиот дел од средбата, но гостите не се предадоа до последната секунда.

Алкалоид подобро го отвори дуелот и постепено ја презеде контролата. Во првото полувреме „сино-белите“ стигнаа до предност од пет гола, 13-8, а на пауза заминаа со солидна предност. Домашниот состав продолжи да ја одржува разликата и во вториот дел. Во еден момент Алкалоид водеше со 25-20 и се чинеше дека е на добар пат рутински да го приведе натпреварот до крај.

Сепак, Тиквеш покажа карактер и не дозволи натпреварот да биде решен предвреме. Кавадарчани успеаја да ја намалат разликата, а драмата кулминираше во самиот финиш. При резултат 30-27, Алкалоид направи две технички грешки, што гостите максимално ги искористија за да стигнат до неверојатно израмнување 30-30.

Последниот збор сепак го имаше Алкалоид. Никола Костески погоди за 31-30 и ја донесе победата за својот тим. Тиквеш во последната минута имаше две можности за израмнување, но обидите завршија без реализација, па бодовите останаа во Скопје. Костески и Митев со по пет гола беа најефикасни кај победникот, додека Бен Махфуд предводеше кај Тиквеш со седум погодоци. Со пет победи од исто толку натпревари, Алкалоид останува на врвот и го следи чекорот на Вардар во досегашниот тек од сезоната.