Трансферот на Мохамед Салах во Бешикташ би можел да пропадне поради несогласувања околу агентската провизија, откри претседателот на турскиот клуб Сердал Адали. Според неговите зборови, египетскиот напаѓач дал согласност да ја продолжи кариерата во Истанбул, а и неговиот агент првично позитивно одговорил на понудата. Сепак, ситуацијата се променила откако во медиумите се појавиле информации дека трансферот е практично договорен.

„Во тој момент агентот побара значително повисока провизија. Не веруваме дека самиот Салах е запознаен со сумите што се бараат“, изјави Адали.

Во меѓувреме, медиумите објавија дека искусниот египетски репрезентативец, кој е слободен играч од почетокот на јули, очекува годишна плата од околу 15 милиони евра. Салах и натаму останува едно од најзвучните имиња на трансфер-пазарот. Минатата сезона одигра 41 натпревар во сите конкуренции, постигна 12 голови и забележа 10 асистенции, а на Светското првенство запиша еден погодок и две асистенции на пет настапи.

Засега не е познато дали двете страни ќе успеат да ги надминат финансиските разлики или Бешикташ ќе се откаже од ангажманот на египетската ѕвезда.