Сенегалската фудбалска федерација ја започна постапката за разделба со селекторот Папа Тиав и неговиот стручен штаб, по направената анализа на резултатите и идните планови на националниот тим. Во официјалното соопштение се наведува дека Извршниот комитет донел одлука да ја активира процедурата поради потребата од нов правец во развојот на репрезентацијата и во интерес на сенегалскиот фудбал.

Тиав ја презеде селекторската функција во 2024 година и под негово водство Сенегал ја освои титулата на Африканскиот куп на нации во 2026 година. Сепак, подоцна Африканската фудбалска конфедерација му додели службен пораз на тимот поради инциденти поврзани со однесувањето на стручниот штаб и фудбалерите во финалето против Мароко. На Светското првенство 2026, Сенегал го заврши настапот во шеснаесетфиналето, каде по продолженија беше поразен од Белгија со 3-2.

Засега од Федерацијата не откриваат кога ќе биде донесена конечната одлука за иднината на Тиав, ниту кој ќе ја преземе селекторската функција доколку дојде до официјална разделба.