Сопственикот на АЕК, Мариос Илиопулос, не го криеше задоволството по убедливата победа од 4:0 над Левски, со која грчкиот шампион обезбеди место во главната фаза од Лигата на шампионите. АЕК одигра одличен реванш и со сигурна игра стигна до голем триумф, а успехот предизвика огромна еуфорија во клубот. Илиопулос по натпреварот ја опиша вечерта како историска и со голема доза на оптимизам зборуваше за иднината на тимот.

„Ова е историска вечер и момент на голема гордост. Ова е АЕК кој го замислував уште од самиот почеток“, порача сопственикот на клубот.

Илиопулос смета дека пласманот во елитното европско натпреварување е само почеток и дека тимот има потенцијал за уште поголеми достигнувања.

„Овој успех ни дава дополнителна сила и верба дека можат да следуваат уште многу триумфи. Сите сме обединети и гледаме напред. Фудбалот влегува во нова фаза, а работите секојдневно се подобруваат“, додаде тој.

Сопственикот на АЕК посебно го истакна и вложувањето во составот во изминатиот период. Според него, голем број нови играчи покажуваат дека клубот направил вистински потези на трансфер-пазарот, иако дел од јавноста имала поинакво мислење.

„Потрошивме многу пари и реализиравме значајни трансфери. Некои луѓе беа изненадени и сметаа дека одредени засилувања не се најдобрите, но секојдневно гледаме нови квалитети кај овие фудбалери. Овој тим има потенцијал“, заклучи Илиопулос.

АЕК сега го очекува настапот меѓу европската елита, каде грчкиот шампион ќе има можност да се соочи со најдобрите клубови на континентот.