Она што пред само неколку дена изгледаше како неславен и скандалозен крај на репрезентативната кариера на Кристијано Роналдо, би можело да добие потполно поинаков епилог. Фудбалската федерација на Португалија одбива да дозволи нејзината најголема икона да си замине преку споредна врата и веќе подготвува план за смирување на страстите меѓу капитенот и селекторот Жорж Жезус.

Како што пренесува шпанска „Марка“, челниците на куќата на фудбалот планираат итен состанок за следната недела, каде што на иста маса ќе седнат Роналдо, Жезус и највисокото раководство на федерацијата. Првиот човек на португалскиот фудбал, Педро Проенса, ги направи првите чекори за медијација уште за време на престојот во Малме, обидувајќи се да ја санира штетата што настана откако Жезус му соопшти на Роналдо дека нема да смета на него за дуелите против Данска и Норвешка.

По убедливиот триумф над Данците, португалскиот стратег се обиде да ја спушти топката и да го намали притисокот од јавноста, искрено признавајќи:

„Не знам дали целата земја е со мене. Тоа наистина не го знам, но секако дека би сакал да биде така.“

Иако Роналдо демонстративно го напушти кампот во Копенхаген, тој сè уште ја нема официјално затворено вратата за националниот тим, најавувајќи само дека „во свое време“ ќе ги соопшти сите детали за својот потег. Во федерацијата преовладува ставот дека две децении историски успеси не смеат да завршат со кавга, па претстојните денови ќе бидат клучни за иднината на Роналдо во црвено-зелениот дрес.