Најголемата регионална ММА организација ФНЦ утре го одржува својот нов настан „ФНЦ 31“ во белградската Арената. Главна борба на вечерта ќе биде долгоочекуваниот дуел за титулата во средна категорија меѓу актуелниот шампион Џани Барбир од Хрватска и српскиот предизвикувач Александар Џокер Илиќ. За оваа пресметка се зборува веќе со години во боречките кругови. Домашниот борец Илиќ се наоѓа во серија од три победи со нокаут во првата рунда, додека за Барбир ова е прво појавување по неуспешниот обид да избори договор со најсилната светска организација УФЦ.
View this post on Instagram
Во втората по важност борба, домашниот тешкаш Дарко Стошиќ ќе ги одмери силите со поранешниот УФЦ борец од Америка, Грег Харди. Стошиќ доаѓа по победа со технички нокаут во Минхен, додека Харди во својот последен настап славеше со судиска одлука. Програмата во Белград носи уште една борба за шампионски појас, во која полскиот првак во велтер категорија Камил Краска ќе ја брани титулата против искусниот хрватски борец Ивица Трушчек, за кого ова ќе биде 86-ти професионален ММА натпревар во кариерата.
Големо внимание привлекува и дебито во ММА на познатиот хрватски боксер Хрвоје Сеп. Тој ќе се бори по ММА правила против искусниот Васо Психо Бакочевиќ, кој зад себе има 70 професионални настапи. Веднаш по нив, во кафезот излегува и младиот српски борец Марко Бојковиќ, кој ќе бара победа пред домашната публика против Полјакот Пјотр Нјеџиелски.
Белградската Арена е подготвена за возбудлива вечер со вкупно 11 планирани борби и врвна продукција која гарантира врвен спортски спектакл. Интересот кај публиката е огромен, а организаторите соопштија дека влезниците се веќе пред распродавање. За сите вљубеници во ММА кои нема да бидат присутни на трибините, возбудата во живо започнува утревечер во 19:30 часот, со директен пренос на интернет-платформите „Voyo“ и „FNC.tv“.